:
Breaking News

گیا میں انتخابی گاڑی سے شراب برآمد، سیاسی حلقوں میں ہلچل، پولیس کی تفتیش جاری

top-news
https://maannews.acnoo.com/public/frontend/img/header-adds/adds.jpg

گیا(بہار):بہار اسمبلی انتخابات2025کے دوران منگل کو گیا ضلع کے گرارو تھانہ علاقے میں اس وقت سنسنی پھیل گئی جب ہندستانی عوام محاذ(ہم) امیدوار دیپا مانجھی کی انتخابی گاڑی سے غیر ملکی شراب کے17کارٹن برآمد ہوئے۔یہ کارروائی رونا ریلوے کراسنگ کے قریب ہوئی جہاں مقامی لوگوں نے مشتبہ گاڑی کو روک کر پولیس کو اطلاع دی۔عینی شاہدین کے مطابق گاڑی کی ایک موٹر سائیکل سے ٹکر کے بعد جھگڑا ہوا اور دیہاتیوں نے گاڑی کی تلاشی لی۔پلاسٹک شیٹ ہٹانے پر شراب کے کارٹن نکل آئے۔کچھ لوگ بوتلیں نکال کر لے جاتے بھی دیکھے گئے۔پولیس نے موقع پر پہنچ کر شراب ضبط کرلی اور گاڑی کو قبضے میں لے لیا۔
سٹی ایس پی رامانند کمار کوشل نے تصدیق کرتے ہوئے بتایا کہ گاڑی پر “ہم” امیدوار کے پوسٹر لگے تھے،مالک کی شناخت کی جارہی ہے۔انہوں نے کہا کہ معاملہ شراب بندی اور انتخابی ضابطہ اخلاق کی دفعات کے تحت درج کرلیا گیا ہے۔
دوسری جانب ہم پارٹی کے ترجمان راجیش پانڈے نے بیان جاری کیا کہ “جہاں سے شراب ملی ہے وہ علاقہ امام گنج اسمبلی حلقے میں نہیں آتا،یہ ہماری انتخابی گاڑی نہیں ہے،ممکن ہے کسی شراب مافیا نے پارٹی کا پوسٹر لگا کر نقل و حمل کی ہو۔”
امام گنج میں دوسرے مرحلے کی ووٹنگ 11نومبر کو ہوگی اور گنتی 14نومبر کو۔
یہ واقعہ ایسے وقت میں سامنے آیا ہے جب پورے بہار میں ماڈل کوڈ آف کنڈکٹ نافذ ہے اور پولیس نگرانی سخت کرچکی ہے۔اب دیکھنا یہ ہے کہ تحقیقات کہاں تک پہنچتی ہیں—یہ کوئی سیاسی سازش تھی یا انتخابی نام کے سائے میں قانون سے کھلواڑ۔

https://maannews.acnoo.com/public/frontend/img/header-adds/adds.jpg

Leave a Reply

Your email address will not be published. Required fields are marked *